मराठी बोली अन् भाषा कशी श्रेष्ठ आहे, हे सांगणारी ‘माझी बोली असे मराठी’ ही मा. रा. पोतदार यांची कविता आज पाहू या...
..........
माझी बोली असे मराठी
जी शिवबाच्या फुलली ओठीं
ज्ञानेशाला त्या तुकयाला
नाचविले नित भक्तीसाठी
माझी बोली असे मराठी
झुंज झुंजली सत्यासाठी
परचक्राच्या घोर संकटी
अन्यायाची फोडून छाती
माझी बोली असे मराठी
जिने सोसले प्रहार पाठीं
पचवुन हलाहल; अमृत ओठीं
तीच असे मम माय मराठी
माझी बोली असे मराठी
जिने शिकविला स्वाभिमानही
ज्या बोलीस्तव रणांत मेले
शूर-वीर ते लाखो गणती
माझी बोली असे मराठी
उभी राहिली संतांपाठी
शूरांची, नरवीरांची जी
फुलवित, उजळित छाती छाती
माझी बोली असे मराठी
जीस्तव झिजले कविवर शाहिर
भाष्यकार ते निबंधकार
नाटककर्ते किती मातब्बर
माझी बोली असे मराठी
प्राणाहुन ती प्रियतम मजला
महाराष्ट्राची पवित्र भूमी
करिते मंगल वेळोवेळी
असोत बोली कितीक सुंदर
परि श्रेष्ठचि मज माय मराठी
अभंग उज्ज्वल ही मम बोली
देह जळो हा तिचियासाठी
- मा. रा. पोतदार